Sapoé Jeput Kulinéran di Sapanjang Jalan Gading Tutuka Soreang

- Selasa, 29 Juni 2021 | 14:00 WIB
Salah satu sudut di Gading Tutuka
Salah satu sudut di Gading Tutuka

SOREANG, AYOBANDUNG. COM – Pikeun urang Soreang-Banjaran-Ciwidey mah moal birek deui ka nu ngaranna Jalan Gading Tutuka Soreang. Komo, saprak tungtung belah kalérna nembus ka Tol Soroja mah ieu jalan teh beuki ramé pisan. Teu salah lamun Jalan Gading Tutuka aya nu nyebut étalasena Kota Soreang. Sabab, sagala kulinér aya di jalan ieu.

Jalan Gading Tutuka panjangna kurang leuwih sakilo meter. Aya dua ruas jalan, nu ka kalérkeun jeung ka kidulkeun. Di tengahna dibates ku taman nu  pinuh ku kekembangan. Rupa-rupa. Rupi-rupi. Pami ti jalan Raya Kopo-Soréang mah—méméh Gapura Pemda Kab. Bandung—setopan lampu mérah, méngkol ngénca. Bras, wéh.

Jalanna alus banglus. Beton dibuleun ku aspal. Kaurus. Tungtungna mentok di Jalan Raya Soréang-Banjaran. Tah éta nu disebut Jalan Gading Tutuka 1. Maké angka hiji sotéh pédah di belah kidulna aya Jalan Gading Tutuka 2.

Salain tempat pusatna kulinér, di jalan ieu aya tempat pamarintahan Soreang nu penting—Gedung Samsat Kabupaten Bandung jeung Gedung anyar nu megah, nu can lila diresmikeuun, RS Oto Iskandar Dinata.

Naha Jalan Gading Tutuka maké disebut pusatna kulinér Soreang, hayu geura  urang tatanan.

1. Bubur Ayam Mang Ading
Upami isuk-isuk ngulampreng di jalan ieu, loba piliheun kulinér jang sasarap--kupat tahu singaparna, ketoprak Cirebon, surabi, sangu konéng, soto ayam madura, lontong sayur, bubur ayam, jeung sajabana. Tapi nu paling raména mah bubur “Mang Ading”.

Geus puluhan taun, bubur Mang Ading maneuh di tempat éta. Asalna mah didorong. Tempatna teu jauh ti Kantor Samsat, malahan sajajar. Buka unggal poé, isuk-soré. Unggal poé nu meuli ngagimbung, komo poé Saptu jeung Minggu mah. Jam 9 geus béak.

Harega samangkokna 8-10 rébu. Buburna teu bodas, tapi rada konéng da dina langseungna geus dicampur ku kaldu hayam. Topingna pinuh ku daging hayam nu disewiran atawa jeroan hayam. Aya ogé bala-bala bumbu kaldu, ditopingan ku bungbu kacang.

2. Ayam Geprék Pangeran
Pabeubeurang lamun beuteung geus ménta dahar, aya sababaraha piliheun jang nyumponanna. Mun boseun ku asakan padang atawa asakan Sunda nu geus biasa, digigireun RM Ampera, aya Ayam Geprek Pangéran di tungtung wétan. Ieu gé lumayan ramé. Hargana ti mimiti Rp15.000 nepi ka 25.000 gumantung naon tambahanna. Rasana rada béda ti ayam geprék séjén. Sambelna rupa-rupa. Dikemas ku ala résto, tapi tetep maké harega kaki lima. Ditambah tempatna rada enakkeun. Cocog keur barudak ngora mah.

Halaman:

Editor: Dudung Ridwan

Terkini

Cerita Pendek: SUATU HARI TANPA ISTRI

Sabtu, 9 Oktober 2021 | 11:46 WIB

Sastra Sunda: LAWUNG DI BASISIR CIUJUNG

Sabtu, 2 Oktober 2021 | 10:32 WIB

Sastra Sunda: LAGU PANINEUNGAN

Sabtu, 18 September 2021 | 09:42 WIB

Cerita Pendek: INTEROGASI

Sabtu, 11 September 2021 | 10:33 WIB

Sastra Sunda: MAPAG UDAT-UDAT BALEBAT

Sabtu, 4 September 2021 | 10:04 WIB

Cerita Pendek: TATAPAN MATA

Sabtu, 28 Agustus 2021 | 07:48 WIB

Sastra Sunda: NU CÉPLAK JEUNG SEUHAH

Sabtu, 21 Agustus 2021 | 09:13 WIB

Cerpen: Mantra Kuno di Kajoetangan

Sabtu, 14 Agustus 2021 | 12:06 WIB

Sastra Sunda: KATURUG KATUTUH

Sabtu, 7 Agustus 2021 | 10:15 WIB

Sastra Sunda: MAPAG HIBAR PANGHAREPAN

Sabtu, 24 Juli 2021 | 13:59 WIB

Sastra Sunda: ÉLÉGI PANDEMI

Sabtu, 10 Juli 2021 | 10:47 WIB

Nu Dijilbab Kayas

Selasa, 22 Juni 2021 | 14:59 WIB
X