Kakarén Lebaran

- Kamis, 20 Mei 2021 | 12:48 WIB
Ilustrasi Nastar.
Ilustrasi Nastar.

LENGKONG, AYOBANDUNG.COM -- Lebaran geus saminggu ninggalkeun urang. Mun jang nu maksakeun mudik ka luar kota mah kari capéna, jeung kapaksa méméh ka imah deui téh kudu nurut ka aturan pamaréntah—kudu tés antigen heula. Wayahna wé jang kasalametan saréréa.

Nu teu mudik ge teu kurang capéna da ti méméh Lebaran geus pakpikpeuk nyieunan kuéh wajib: nastar, putri salju, kuéh kacang, kasténgel, cistik, jeung kuéh kering séjénna. Geus puguh sabangsaning dahareun tradisional mah: opak, ranginang, téngténg, peuyeum ketan, ulén, jrrd.

Di poé Lebaranna nu wajib kudu aya: opor hayam jeung kupatna. Ditambah tumas tumisna: sambel goréng hui, capcay, jeung tumis cabé gendot. Mun aya kénéh duitna, tambahan ku rendang atawa gulé cokor sapi.

Dahareun éta téh ampir di unggal imah aya. Jadi, mun nyémah ka tatangga atawa ka sadérék téh tara mak-mak mek-mek kana dahareun. Cukup saayana, ukur ngabagéakeun tuan rumah. Samalah, aya nu teu nyabak-anyabak acan—cukup silaturahmi, cukup sasalaman. Naon sabab? Da di imah gé sarua loba dahareun.

Tah, lantaran di unggal imah loba kadahareun, tungtuna loba sésa dahareun. Loba “kakarén”. Meureun ti dieu mimitina muncul istilah “kakarén” téh. Ceuk Kamus Basa Sunda R. Satjadibrata mah kecap “kakarén” téh robahan tina kecap kakarian—kari, sésa. Kadahareun urut. Tangtuna lain ngan saukur kadaharan sésa Lebaran wungkul, nu ngaranna “kakarén” bisa ogé kadaharan sésa urut hajat badag: kakarén hajat.

Geuning, sok aya paribasa “hayu urang nganjang ka imah si Pulan nu geus ngawinkeun. Urang moro kakarénna.”

“Kakarén” Lebaran dina waktu saminggu, sabulan, atawa leuwih—malah nepi ka éta dahareun kadaluwarsa--sok araya kénéh di imah. Nastar teu ka toél. Anggeur na toplés, teu nyocéng. Kuéh putri salju awét, malah mah bodasna aya héjoan, barulukan. Rék dibikeun, batur ge barogaeun kénéh. Paling, ari teu boseun mah dicicil, didaharan bari lalajo tivi. Tapi, lila-lila boseun ogé.

Sawaréh dibawa ka kantor. Tapi batur sakantor gé barogaeun. Geus puguh, tumas tumis mah geus dihijikeun, jadi haseum. Dihaneutkeun deui. Dihaneutkeun deui, atuh ngaranna robah jadi “boléndrang”. Lila-lila mun didahar pipanyakiteun. Tungtungna dipiceun.

Unggal taun kitu téh. Rék aya sasalad covid 19 atawa henteu. Angger unggal Lebaran sok ninggalkeun kakarén—kakarén, sésa, nafsu-nafsu urang.

Halaman:

Editor: Dudung Ridwan

Terkini

Cerpen: ROH SI PUYANG

Sabtu, 23 Oktober 2021 | 13:52 WIB

Cerita Pendek: SUATU HARI TANPA ISTRI

Sabtu, 9 Oktober 2021 | 11:46 WIB

Sastra Sunda: LAWUNG DI BASISIR CIUJUNG

Sabtu, 2 Oktober 2021 | 10:32 WIB

Sastra Sunda: LAGU PANINEUNGAN

Sabtu, 18 September 2021 | 09:42 WIB

Cerita Pendek: INTEROGASI

Sabtu, 11 September 2021 | 10:33 WIB

Sastra Sunda: MAPAG UDAT-UDAT BALEBAT

Sabtu, 4 September 2021 | 10:04 WIB

Cerita Pendek: TATAPAN MATA

Sabtu, 28 Agustus 2021 | 07:48 WIB

Sastra Sunda: NU CÉPLAK JEUNG SEUHAH

Sabtu, 21 Agustus 2021 | 09:13 WIB

Cerpen: Mantra Kuno di Kajoetangan

Sabtu, 14 Agustus 2021 | 12:06 WIB

Sastra Sunda: KATURUG KATUTUH

Sabtu, 7 Agustus 2021 | 10:15 WIB

Sastra Sunda: MAPAG HIBAR PANGHAREPAN

Sabtu, 24 Juli 2021 | 13:59 WIB

Sastra Sunda: ÉLÉGI PANDEMI

Sabtu, 10 Juli 2021 | 10:47 WIB
X