Carita Pondok: MALATI KARI BODASNA

***

Cireumis 'na tungtung dangdaunan ngareclakan ngawakilan cipanon kuring nu geus lila garing. Teuing naon pédahna, geus lila gé teu bisa deui ceurik ngageunggeuik da kahayang mah gagauran ngarah longsong.

Poto budak dina hapé diteuteup deui. Budak nu keur ceurik dina lahunan bapana nu nyengir pikasieunuen.

Haté ngajerit. Gusti, salametkeun kembang katresna abdi. Gening nu kasép téh sakitu seukeut haténa. Teu kaur dideukeutan ku Bapana sok tuluy léwéh. Emh, hampura indung hidep, Sujang. Hampura teu bisa gabagjakeun hidep. Bet diparengkeun boga Bapa sahaok gaplok nu taya nurani ka budak pentil gé.

Deudeuh anaking, meureun salila ieu batin hidep jumerit. Hampura indung hidep nu teu peka. Hampura salila ieu tohtohan teuing ngudag dunya nu tungtungna mah kalah beuki dipaké teu bener ku bapa hidep. Hampura...

Ayeuna waktuna nebus sagala kasalahan ka hidep, anaking. Sanajan kudu taroh nyawa keur hidep, moal mikir panjang.

Pengacara geus ditelepon pikeun nyabut gugatan.

Peuting beuki ngolotan, teu sabar nungguan meletékna srangéngé, hayang panggih jeung kembang katrésna. Geus hayang nangkeup, ngambung seungit kayu putih awakna nu cenah rék dipulangkeun poé isuk.

Jandéla kamar dipeundeutkeun deui. Malati nu maluguran ukur marakbak bodasna, geus teu kaambung seungitna.

YON'S IFA resep nulis ti SMP kénéh. Taun 2009 mimiti nulis dina Basa Sunda. Ayeuna ngokolakeun Pabukon di salah sahiji SMK Swasta.