Sastra Sunda: LALAKON KOPLOK

- Sabtu, 26 Maret 2022 | 08:20 WIB
Ilustrasi carpn Lalakon Koplok. (Arsacadipura)
Ilustrasi carpn Lalakon Koplok. (Arsacadipura)

“USUM jajaluk beuki mahabu! Serbu! Serbuu! Serbuuu!” gorowok Koplok bari ngacung-ngacung peureup hareupeun baliho di hiji parapatan. Baliho anyar masang. Jangkung badag. Baliho nyarandé kana tihang listrik. Potrét beungeut poréngés kumplit jeung ngaran, nomer katut ngaran partѐy. Abong koplok. Ѐta si Koplok jol guyat-géyot. Porosot. Nonghol. Malik. Nonggéng. Bool moncorong kana baliho. Gual-géol. Brot. Sebrot. Podol nyebrot. Koplok noong baliho ti handapeun bool lamokot. Ho-ho-ho. Keprok. Jungkir. Gugulitikan na trotoar. Metot kolor. Beretek. Kalacat kana tihang listrik. Satérékél geus ucang-anggé na pucuk baliho. Nyéréngéh. Hé–hé-hé. Kaén baliho digégél. Duka kumaha carana. Jol béréwék. Baliho disoékkeun. Golosor. Muntangan panyoékan. Gulusur. Béréwék. Soék badag manjang ka handap. Ganjleng. Gulitik. Ѐmprak lebah trotoar. Becir lumpat muru air mancur tengahing parapatan. Kalacat. Jen. Ngajanteng tengahing air mancur. Leungeun kénca ngacung. Meureup. Buleud. Leungeun katuhu ngodok bool. Rancucut. Siga patung. Patung Koplok.

Lampu héjo. Lampu konéng. Lampu beureum.

Sirineu. Cekiiit. Ngépot. Brug. Ngadagor roda tukang céndol. Tukang céndol ngabangkieung laju katinggang roda. Jontowor. Rancucut céndol. Molotot. Nyeuneu. Lol. Bréh. Pulisi kaluar ngabantingkeun panto mobil. Kumis baplang. Tukang céndol ngarengkog. Kekerot jadi ngélémés. Kulapés. Priiit. Tukang parkir nyerenteng. Nincak céndol. Seureuleu. Nubruk nu baplang. Priiit. Piriwit kateureuy. Leungeun pulisi ngaheumbat. Ngetig punduk. Borolo: piriwit, bubur, bala-bala. Muringis. Mulung piriwit tina bayabah utah lebah sapatu pulisi. Priiit. Becir.

Pulisi tanggah. Nyureng. Panonpoé molotot. Baliho rangsak. Gogodeg. Rabul laporan ngeunaan ratusan gambar calég anu diruksak. Disasaak. Unggal usik. Unggal usik nguriling. Taya nu lana. Rarangsak. Sawaréh teu nyésa. Ukur aya tapak durukan. Diduruk. Usum kampanyeu. Nu masang teu bosen-bosen. Nu ngararad teu eureun-eureun. Sabotaseu! Kitu cek nu ti luhur. Kudu dicerek. Ditéwak. Aya nu julig kana démokrasi. Bisa jadi bibit-buit nu baris baruntak. Geus teu kaitung anggota dѐwan katut barisan calég démo ka kantorna. Maranéhna ngarasa aya nu ngajégal. Hanjakal taya raratan saha nu boga dosana. Taya tapakna. Teu kungsi kapanggih. Pulisi ukur gawѐ muril kumis! Kitu ceuk nu nyaralon.

Lampu héjo. Lampu konéng. Lampu beureum.

Tukang céndol ngagukguk. Nyuuh kana roda anu ngagolér. Nyeungceurikan céndol anu bahé campur utah. Ngusapan beling gelas nu amayatak. Di trotoar, tinggaredig anu leumpang. Di jalan, rabeng motor jeung mobil. Tingrarandeg pareng beureum. Tingbelesur dipecut héjo. Konéng geus teu dipaliré. Lebah bunderan tengahing parapatan, patung Koplok rancucut air mancur.

Cekrѐk. Pulisi moto baliho. Mencétan hapé. Belesur poto dikirim ka kantor. Kerenyed. Kéhéd, mana poto mangkelukna? Pulisi ngarénghap. Geus méh bubulanan puguh taya raratan saha-sahana. Taya nu bisa ditanya. Rahayat geus lila teu daék nyarita ka aparat. Gerakan Tutup Sungut anu duka dimimitian ku saha geus ngalemah di mamana. Teu bisa dipaksa. Ham. Jalan lemes teu metu, jalan kasar teu meunang. Aral. Ti luhur dijejek, ti handap teu dianggap. Rét ka tukang céndol. Jeprét. Belesur. Hadé! Bawa ka kantor. Pulisi nyenghél. Geus teu kaitung anu sakahayang dibawa ka kantor. Tiban teu beubeunangan. Sakarepna wé. Soré gѐ pasti dikaluarkeun deui. Pasti ngabetem. Jariga patung. Kitu peta rahayat di kota Owah. Teu kapaluruh saha ulon-ulonna da apan kabéh milu Tutup Sungut. Kekecapan ukur ti maranéhna keur maranéhna. Peun.

 “Milu!” pulisi ngagusur tukang céndol. Merod. Gaur. Kokoséhan. Guyang dina céndol jeung utah. Pulisi teu éléh géléng. Teu paduli utah. Gep. Regeyeng. Dipangku. Adug-adugan. Dengkék. Blus. Gaur. Biur. Sirineu ngabelesat nabrak lampu beureum.

Cekiiiit. Tingcarekit di ditu di dieu. Brukk! Réa sungut mobil nyium bujur mobil. Macét. Ragég knalpot jeung klakson. Motor séséléket. Sapédah dijingjing. Rabul nu leumpang.

Halaman:

Editor: Dudung Ridwan

Tags

Artikel Terkait

Terkini

Carita Pondok: BOROK

Sabtu, 2 Juli 2022 | 10:26 WIB

Cerita Pendek: TIANG LISTRIK

Sabtu, 25 Juni 2022 | 07:00 WIB

Carita Pondok: MORO SAWARGA

Sabtu, 18 Juni 2022 | 09:13 WIB

Carita Pondok: LATAR LAYAR

Sabtu, 4 Juni 2022 | 10:59 WIB

Carita Pondok: DINA TUNGTUNG SIMPE

Sabtu, 21 Mei 2022 | 06:14 WIB

Cerita Pendek: SAJAK LI BAI YANG SEKARAT

Sabtu, 14 Mei 2022 | 09:45 WIB

Carita Pondok: SANEKALA

Sabtu, 7 Mei 2022 | 07:39 WIB

Cerita Pendek: PERTEMUAN PADA SUATU MALAM

Sabtu, 30 April 2022 | 11:31 WIB

Cerita Pendek: KISAH YANG TAK BERKESUDAHAN

Sabtu, 16 April 2022 | 10:48 WIB

Sastra Sunda: DEMONSTRASI

Sabtu, 9 April 2022 | 11:25 WIB

Cerita Pendek: PUASA TANPA KEPALA KELUARGA

Sabtu, 2 April 2022 | 14:04 WIB

Sastra Sunda: LALAKON KOPLOK

Sabtu, 26 Maret 2022 | 08:20 WIB

Cerita Pendek: JERAT BUBAT

Sabtu, 19 Maret 2022 | 05:05 WIB

Sastra Sunda: LEUNGITEUN

Sabtu, 12 Maret 2022 | 10:32 WIB

Cerita Pendek: DERA LARA

Sabtu, 5 Maret 2022 | 06:47 WIB

Sastra Sunda: SRIKANDI ZAMAN NOW

Sabtu, 26 Februari 2022 | 15:12 WIB

Lugiena De jadi Pinunjul Hadiah Sastra LBSS 2022

Selasa, 22 Februari 2022 | 08:17 WIB

Cerita Pendek: PERTEMUAN

Sabtu, 19 Februari 2022 | 11:09 WIB
X