Sastra Sunda: TINA JANDELA

- Sabtu, 30 Oktober 2021 | 10:25 WIB
Ilustrasi carpon Tina Jandela. (Selma Mutia Dwi)
Ilustrasi carpon Tina Jandela. (Selma Mutia Dwi)

Puguh ceuk saha ceuk saha Néng Cingut téh geulis. Matak henteu anéh lamun réa lalaki anu katarik ati sabada ningali potrétna. Hirupna beuki ngaberung. Beuki pipilih. Saukur anu bro-broan anu dilayanan. Nepi ka hiji waktu mah Néng Cingut ngandeg. Duka kumaha, naha bet ngandeg, padahal geus diusahakeun ku pél jeung kondom.

Mulang ka Amih téh sabada ngandeg. Néng Cingut embung ngalayanan saha waé ogé keur ngandeg mah. Amih ngagukguk kanyenyerian. Apih henteu nyarios sama sakali. Tapi Néng Cingut ningali aya anu ngalémbéréh dina pipi Apih. Ti harita Apih mah alim dipendakan. Eta ogé anu matak nyeri. Nyeri ku dirina. Nyeri ku kalakuanana anu ramijud.

Basa terusna Néng Cingut kaluron labuh tina ojég anu nganteur ka bidan, diopnameu aya dua mingguna, Apih mah sama sakali henteu ngalongok. Abah Haji mah sareng Ma Nyai ngahaja ti lembur ngalongok ka rumah sakit. Aya sataunna ti kaluron harita Apih mah alim pendak alim dipendakan. Lebaran ogé apan haré-haré. Malah basa Néng Cingut nyolongkrong rék nyuuh kana dampal sampéanna, Apih kalah ngajengkat.

Néng Cingut ampir unggal solat ngagukguk kanyenyerian. Tara kaluar ti kamarna. Gawéna saukur solat, ngaderes Qur’an, dikir. Bari henteu eureun ari balilihan, nginghak nepi ka ngagukgukna. Hiji peuting keur anteng tilawah, horéng Amih sareng Apih tos aya di payuneunana. Néng Cingut ngagukguk dina sampéan Apih. Teu karasaeun dina rambutna cipruk ku cisoca Apih.

Basa Lebaran mudik ka Négla, Néng Cingut mah henteu balik deui. Bari diajar deui ngaji ka Abah Haji sareng Ma Nyai, tara ieuh kaluar ti kamarna anu paragi Abah Haji nyepén. Nepi ka harita, kanyahoan ku Ma Haji sok nyerangkeun anu leumpang teunangan ka masjidkeun.

“Ngakuna mah manéhna téh urang Jakarta, Néng. Aya kana genep bulanna di dieu. Ngadon diajar ngaji ka Abah. Ngontrak kamar di urang lembur. Nyantri kalong téa disebutna. Lamun subuh tabuh tiluan Abah ka masjid, manéhna sok geus nyampak aya. Tahajud di juru. Sakapeung sok kadangu inghakna anu ditahan,” saur Abah Haji. “Ku Abah kungsi ditakon. Ujang téh ngora kénéh, ulah popohoan ibadah bari henteu diimbangan ku nyiar kipayah, da apan hirup téh kudu dibéayaan. Ari pék, cenah unggal poé ogé nyiar kipayah. Dina hp kutrat-kotrét, dina yutub-yutub kitu. Ah, teu ngarti Abah téh kana pajamanan.”

“Meureun geus jodo, Abah,” saur Ma Nyai. Néng Cingut imut. Kagugu ku Ma Nyai.

Jeung enyana, dijalanan ku Abah Haji, Néng Cingut ditepungkeun jeung jajaka anu sarua keur ngalakonan tobat cenah. Di bumi Abah Haji bada isya jangjianna téh. Ma Haji ngurab ketan dikacangan. Néng Cingut dicadar da embung katingali pameunteu, kecuali engké lamun si jajaka hayang ningali.

Basa si jajaka téa datang, Néng Cingut mah masih di kamar. Abah kakuping ngobrol jeung si jajaka. Ma Nyai terus ngajak Néng Cingut kaluar ti kamar. Barang gék dina sofa, Néng Cingut mani ngagebeg. Reuwas teu puguh rasakeunen. Puguh atuh, jajaka anu tungkul téh beuki sidik mah horéng téh Rudi. Rudi lanceukna Tita, anu ngagubruskeun dirina kana jurang geugeuleuh.

Henteu kungsi dipénta, Néng Cingut muka cadarna. Ayeuna mah Rudi anu ngagebeg, diukna nepi ka mundur. Horéng incu Abah Haji anu cenah aya taunna tara kaluar ti kamar, saukur ngaji-solat-dikir, horéng téh mojang anu kungsi digeugeuleuhna, mojang anu nyababkeun dirina ngarasa dosa saumur hirupna, mojang anu nyababkeun dirina henteu ngahampura kana kalakuanna sorangan.

Halaman:

Editor: Dudung Ridwan

Tags

Artikel Terkait

Terkini

Cerita Pendek: DI DEPAN JENAZAH BAPAK

Sabtu, 6 Agustus 2022 | 09:07 WIB

Carita Pondok: MANG INTA MUNGGAH HAJI

Sabtu, 30 Juli 2022 | 06:13 WIB

Cerita Pendek: KADIR DAN SELAWAT KERUPUK UDANG

Sabtu, 23 Juli 2022 | 12:00 WIB

Carita Pondok: NU HARAYANG DITIKAH

Sabtu, 16 Juli 2022 | 10:06 WIB

Cerita Pendek: GARA-GARA TELEVISI

Sabtu, 9 Juli 2022 | 10:10 WIB

Carita Pondok: BOROK

Sabtu, 2 Juli 2022 | 10:26 WIB

Cerita Pendek: TIANG LISTRIK

Sabtu, 25 Juni 2022 | 07:00 WIB

Carita Pondok: MORO SAWARGA

Sabtu, 18 Juni 2022 | 09:13 WIB

Carita Pondok: LATAR LAYAR

Sabtu, 4 Juni 2022 | 10:59 WIB

Carita Pondok: DINA TUNGTUNG SIMPE

Sabtu, 21 Mei 2022 | 06:14 WIB

Cerita Pendek: SAJAK LI BAI YANG SEKARAT

Sabtu, 14 Mei 2022 | 09:45 WIB

Carita Pondok: SANEKALA

Sabtu, 7 Mei 2022 | 07:39 WIB

Cerita Pendek: PERTEMUAN PADA SUATU MALAM

Sabtu, 30 April 2022 | 11:31 WIB

Cerita Pendek: KISAH YANG TAK BERKESUDAHAN

Sabtu, 16 April 2022 | 10:48 WIB

Sastra Sunda: DEMONSTRASI

Sabtu, 9 April 2022 | 11:25 WIB

Cerita Pendek: PUASA TANPA KEPALA KELUARGA

Sabtu, 2 April 2022 | 14:04 WIB

Sastra Sunda: LALAKON KOPLOK

Sabtu, 26 Maret 2022 | 08:20 WIB

Cerita Pendek: JERAT BUBAT

Sabtu, 19 Maret 2022 | 05:05 WIB
X